myblog

我的生日

2009-07-23T23:58:57Z

今年生日真係好多超驚喜，非常開心，先係o仔份生日禮物，首先佢唔係一個有心思既人，但佢今年竟然送左一份好有心思既既禮物俾我，係一個用木做既相架連音樂盒，上面畫左四個人仔，每個都寫左個名，包括我、o仔、娃 &熊仔餅，真係好開心，可惜無相睇(因為不幸地生日個日個電話整濕左，壞左.......)。令外第二個驚喜就係娃整左個生日蛋糕俾我呀!!!!! 熊仔餅就估到會整，但娃真係估佢唔倒，我仲要係佢第一個同事整生日蛋糕，勁巴閉，呵呵呵! 仲有佢送俾我既钩嘢書，金魚散紙包，金魚滑鼠，金魚手機吊飾，手畫郵票，真係開心到爆。還有熊仔餅，佢個檸檬益力多芝士蛋糕，超好味(不過娃個個都好好味呀~!)，還有佢畫個兩隻雀，我以為佢唔會畫俾我，點知佢竟然記得畫俾我，好開心。還有呀jack佢竟然買左啲我以為佢唔會買既嘢俾我，還有就係今年發現公司竟然仲有兩個人同我同一日生日，真係估到估唔倒呀! 總括嚟講，今年生日真係好多驚喜好開心，多謝各位好朋友，我愛你們呀!!!!!!!

好攰

2009-03-17T22:38:47Z

好耐無上嚟寫嘢啦! 我好羡慕娃咁勤力，三個之中，得佢一個仲堅持成日update個blog，其實今日上嚟，都係因為有d嘢唔開心，想抒發下呢刻既心情，我呢d負面情緒，真係就嚟令到我儍，好攰.....正如康康想講，不想做大人，做大人要諗太多嘢，要做太多爭扎，太污穢，要做太多違背良心既嘢，太假，我開始唔知道，我係一個有良心既嘢，還是我一直扮有良心?

一年回顧

2009-01-20T11:53:36Z

08年對我嚟講簡直係流年不利，發生左好多唔開心既嘢，祈望新一年有新開始。本來09年開始時都幾好，點知我二佬意外入急証室，成面傷曬，手指骨裂，當晚真係擔心死我，好彩依家叫做康復中。不過，可惜一波未平就一波又起，係公司比人投訴，做慘佢講d嘢簡直係離譜，依家仲要搞到我寫statement，係度做左十幾年都未試過寫，你話係迷邪吖! 總之希望過完年d霉運走曬，同時亦祝大家身體健康，生活愉快!

不公平

2008-12-13T15:50:10Z

今日我問主任k新間表會否再傾? 咁佢話同老闆商量過，老闆覺得要半年轉一次及攞返d sch. off出嚟抽公平d，咁我話可否問大家既意向呢? 唔好佢自己一個人決定好d，我覺得少數服從多數啫，點知講講下主任k話老闆覺得我人工高，加上份約寫明要返d irregular hrs ，話如果佢衰d可以出張irregular time table俾我，我都無得出聲，又話讀書學嘢問題要自己搞點，出面大把私人公司都係咁，唔通你咁大個人要我幫你諗埋呀? 我聽到呢度我好嬲，我同主任k講人工高? aco人工都高啦! 點解次次都係蝦我哋d contract? 我之不過覺得要民主d啫，唔通我有錯? 個個老闆都係咁，我做返自己應做既嘢，唔需要咁勤力，我都一樣有糧出，正常都會照續約，做多都無用咖，一句你人工高咁多聲音做咩啫，唔冼講嘢啦! 做左咁多年，做到無意思，但為生活無辦法，算吧啦，做個求其d既員工，唔冼再過份努力，反正無人欣賞。

大驚喜

2008-11-19T23:38:58Z

尋日男友J俾左一個好大既驚喜我，真係好開心好感動，並不是因為份禮物貴重，而係個份心意個份心思，講真識左佢咁耐，佢俾我既驚喜真係一隻手都數得曬，雖然一早知佢唔係一個浪漫既人，但大部份女人都希望另一半能夠成日俾驚喜自己，女人可能都比較自私，明明自己都好少俾驚喜佢，但又希望另一半咁做，大部份女人係自己喜歡既人面前都比較任性，希望你能原諒我這個既自私又任性既女朋友....

竟然懂得叫我同事駛開我，然後靜悄悄放係我枱面的禮物!

該認命嗎?

2008-11-13T17:31:41Z

究竟點解明明爭取緊一d應得既嘢，但攪到好似做賊咁呢? 點解明明自己無做错，但終日要提心跳膽呢? 是否我太耐弱? 或是我太無用呢? 點解要害怕呢? 點解唔懂得反抗? 難道打後還是要這樣過?

今日又瘀左

2008-11-10T18:30:45Z

今日有間幼稚園嚟借書，平時佢寫左個名之後我會係counter張嘢度揾個card no.，點知唔記得左佢唔係嚟開既熟客，個list緊係無啦! 諗住check機，點住只係揾到間類似既，打俾間學校，佢十問九唔知，話有關同事唔係度，諗住打去ntk問(因同事話佢去開ntk借書)，點知ntk話借開個間就係我話類似個間，最後諗住明天先打去學校問，點知ntk個同事好好，打嚟話幫我係電腦度check倒，原來係有不過係前一板，收線後我好唔開心，其實係我一開始只係打左間學校頭幾個字去揾，所以我迷揾唔倒囉! 我都唔明點解我成日做人到係咁，成鬼日都好心急，又大意，人哋寫左個全名俾我，但我無打曬，仲要攪到又打去學校又打去ntk煩人哋，我呢種性格害左自己好多次，點解仲係改唔倒，好討厭自己!!!!!

好累了，已經不能再容忍了!

2008-10-13T13:27:05Z

今日終於忍唔住爆發了，係老闆面前講話我真係頂唔順個個人啦! 自私，小氣，又鍾意亂發脾氣，樣樣都好似佢大曬，佢啱曬，成日搞到好似好委屈咁，成日都覺得我哋恰佢，講真我哋呢度d同事好咋! 唔想搞咁多嘢，明知佢性格咁，個個都忍佢，但係佢一d都無諗下人哋，佢試下係出面d公司做，俾面你都儍，大佬呀~! 做人唔係咁做o家，你知唔知你搞到我哋唔想返工呀? 以前覺得返工好開心o家，依家...... 佢究竟知唔知佢好有問題o家? 基本上大部份人都知佢有問題，至不過大家唔出聲啫，佢從來都無檢討下自己! 點解佢唔識得掉返轉頭諗下，點解咁多人都唔係好鐘意佢呢? 淨係識得亂發脾氣，一d都無長大，我哋唔係你屋企人，無理由要睇你面色，好多嘢係要講道理，但係你都無道理，要人點服呀?

無聊吹水

2008-09-11T14:20:03Z

前幾日同事ｋ忽然話唔知係迷因為轉天氣涼左，突然間想起好多前塵往事，例如讀書時期既事。我同佢講我都會有呢種感覺，尤其係秋天同冬天，感覺會更大，唔知點解每到呢ｄ時期都會有一種寂寞、冷清既感覺。會勾起好多往事，但我尋日問我男朋友會唔會有呢ｄ感覺，佢斬釘截鐵話”無”，唔通真係正如同事ｋ所講，係迷因為我哋比較感性，所以先會咁？

唔知點好

2008-09-06T16:18:52Z

今日發生左一件事，係關於2個老闆之間既問題，其實成件事只之不過係係好多個誤會之下發生，但係就攪到佢哋2個更加唔鐘意對方，真係唔知點好。依家成個office都已經變得好麻煩，好多是非，好懷念以前，大家比較和洽既日子，但係我知道已經唔可能再好似以前咁.....

今日心情

2008-08-21T17:33:32Z

今日心情好差，除了近排要應付d麻煩讀者外，主力係覺得現在返工無以前咁開心，老實講係拉記做左十幾年，我諗做得最唔開心都係呢2~3年，呢1年就更加有呢種感覺，問題主要發生係人事上，可惜係除非我唔做，如果唔係我相信呢個情況應該唔會有改善，或者會慢慢惡化落去......但係據我既學歷，我可以去得邊吖? 唯有希望我層樓可以賣個好價，有d錢係手，有咩事都定d吖......

生日

2008-07-23T17:36:39Z

剛過了生日，同事們送了一部我很想要的MP4，我真的很開心!!! 但同時有覺得令到佢哋咁嘥錢，真的有點過意不去。亦都好多謝fai仔整左張超級勁靚既生日咭俾我，你實在太有心思啦!今年比較特別，食左3次生日蛋糕，許了3次生日願望，但都係許了希望個病快d好番，希望願望成真啦!!

病

2008-07-16T15:11:22Z

呢幾個月一直都被d風疹困擾，心情已經唔係幾好。最慘係今日去覆診，醫生話我食住藥都出成咁，佢話我應該唔係普通風疹咁簡單，正常風疹24小時內就會退，但會係第二度再生過，但我個d成幾日都唔退，仲生左係微絲血管入面，情況比較麻煩，最差情況何能係紅斑狼瘡。醫生話須則未別一定係，但就算唔係都有可能係我自身免疫系統出現問題，但可能查唔原因。聽完係個心沉左一大半，諗住打俾呀媽安慰下我，點知呀媽好勞噪話個醫生醫唔好我，專登講得嚴重d嚟嚇我，個一刻我真係超級勁唔開心，我打俾呀媽係想佢安慰係我，而唔係好似話我蠢俾人呃!!!!

真係估唔到

2008-07-10T23:59:17Z

今日公司發生左一件事，搞到個個情緒都變得幾波動，個個都唔識得做嘢。唉.....講真我都覺得幾愕然，估唔倒個同事會講句咁既說話，實在太恐怖，難怪同事r & 同事a咁嬲，其實我都唔明個同事點解要搞到咁薑，何必呢? 迷盞比左個壞印象啲同事。

四川大地震

2008-05-18T14:16:22Z

近日睇左唔少關於四川既報導，睇到個心好酦，流左唔少眼淚。真係唔明點解中國今年會發生咁多事，希望老天爺好心，唔好再有咁多天災人禍。在此我希望各方好友行行善去捐款，真係多多益善，少少無區! 多謝! 多謝! 另外，我想在此多謝所有有份幫助救援既人，連日嚟係新聞見到佢哋好辛苦咁不停救人，真係多謝你哋! 亦很高興今次中國係救人各方面都做得好好，得到各界既高度讚揚。同時亦都好想好想大聲高叫好感謝好感謝我哋既温總理及胡主席，真係辛苦你哋不停去視察災情，指揮救援行動，亦不停去安慰災民，真係好感動，尤其温總理係發生事故後立刻趕去災場，真的好多謝好多謝你們!